Rupmaša lihkadeapmi – duddjoma ja vásáhusa estehtalaš mearkkašupmi

Čoahkkáigeasut

Duddjon lea doaibma mas duojár geavaha iežas máhtuid maid lea oahppan, vásáhusaid bokte, duddjodettiin ja go lea hárjánan geavahit duoji. Go geahččat mo duodji lea áddejuvvon sámiid gaskkas, de doaimmat ja dagut hábmejit muhtun muddui dan mo oaidnit duoji estehtalaš beliid. Dán artihkkalis digaštalan mo dagut, vásáhusat ja lihkastagat váikkuhit duddjoma estetihkkii. Sámegielas leat doahpagat maid vuođul sáhttá áddet dan maid omd. vuogas, cieggat varrii ja gamus dovdan sáhttet mearkkašit. Go duojis lea sáhka, de dat lea oassin olbmuid eallimis, iige sirrejuvvon eret das. Muitu, ja čiekŋalis muitu duddjomis, leat rupmašis, ja mii duddjot buoridan dihtii dávviriid ja oažžut maid buorre dili. Olmmožin mii lihkadit máŋggalágan vásáhusaid siskkobealde, sihke jurdagiin ja rumašlaš sirdimis. Dakkár beliid oaidná maiddái duoji oktavuođas.

Artihkkalis geahčan mo mii duddjodettiin geavahat rupmaša, ja mo dat váikkuha olles duojárii. Geahčan álggus duddjoma árgabeaivvi dilis, ja dasto mo das sáhtášii hukset áddejumi sámi ja duoji estetihkas, ja mo dát heive eará eamiálbmotestetihkkaságastallami idda. Geavahan duddjonovdamearkkaid maid ieš lean ja eará duojárat leat vásihan. Dasto iskkan pragmáhtalaš ja rumašestehtalaš lahkonanvugiin mo dahku ja rumašlaš lihkadeami váikkuha duddjomii ja olbmui.