Áigečállaga birra

Fágaguoibmeárvvoštallon sámegiel dieđalaš áigečála

Sámi dieđalaš áigečála (SDÁ) lea máŋggafágalaš dieđalaš áigečála mii almmuha sámedutkama guoski artihkkaliid, man Sámi allaskuvla ja UiT Norgga árktalaš universitehta Sámi dutkamiid guovddáš almmuhit ovttasbarggus. Vuosttaš nummar ilmmai 1994:s.

Máŋggafágalaš dieđalaš áigečála

Sámi dieđalaš áigečála lea sámegiel máŋggafágalaš dieđalaš áigečála mii almmuha vuosttazettiin dieđalaš artihkkaliid, muhto sáhttá maiddá almmuhit girjeárvvoštallamiid ja kommentára čállosiid. Áigečála almmuhuvvo sihke bábirhámis ja elektrovnnalaš hámis, mii lea nuvttá ja rabas buohkaide. Áigečállaga doaimmahusgoddi bovde čálliid sáddet dieđalaš artihkkaliid ja eará namuhuvvon čállosiid áigečállagii, ja daid sáhttá sáddet sisa miehtá jagi.

Giella

Sámi dieđalaš áigečala almmuha sihke davvi-, julev- ja lullisámegillii. 

Rabas dutkan

Sámi dieđalaš áigečála lea dieđalaš áigečállagiid ja lágádusaid Norgga registaris dohkkehuvvon almmuhankanálan 2. dásis, ovdamearkka dihte Cristin-vuogádagas. Suoma publikašuvdnaregistaris lea Sámi dieđalaš áigečála dásis 1. Áigečála lea PKP Preservation Network mielde guhkkitáigge vurkema geažil.

Open Access-bagadus

Bout sisdoallu Sámi Dieđalaš Áigečallagis lea rabas buohkaide. Dahkkivuoigatvuohta gullá čálliiide. Bout sisdoallu lea Creative Commons Attribution 4.0 International liseanssa vuolde, muhto čállit sáhttet váljjet eará Creative-Commons liseanssa. Áigečallagis ii leat makkarge diva sisasáddema dahje árvvostallama ovddas.

Neahttasiiddu birra

Sámi dieđalaš áigečála lea 2023 rájes sirdimin Wordpress neahttasiidduin dán geavahanvuogádahkii, maid Septentrio Academic Publishing doaimmaha. Buot Sámi dieđalaš áigečállaga sisdoallu sirdojuvvo dađistaga Septentrio geavahanvuogádahkii. Gaskaboddosaččat leat ain ovddeš almmuhuvvon nummirat ja eará dieđut olámuttus áigečállaga Wordpress neahttasiidduin.

Sámi dieđalaš áigečállaga Septentrio siidu galgá ollásit jorgaluvvot davvisámegillii go Open Journal System-prográmma geavahanlakta davvisámegiela várás lea ráhkaduvvon.