Boahtán čállosat

Čállinrávvagat

Čállinrávvagiid galgá čuovvut earenoamáš dárkilit. Čálli ferte ieš divvut čállosa maŋŋel jus teaksta ii leat hábmejuvvon rávvagiid mielde. Sámi dieđalaš áigečála lea hábmen čállinrávvagiid (2015) maid maiddái sáhttá geavahit artihkalvuođđun.

Čállinrávvagat Word-fiilan (2015)
Čállinrávvagat PDF-fiilan (2015)

Dieđut čálliide

Sámi Deđálaš áigečala geavaha ICMJE definišudvna čálliin ja mieldečálliin. 

Čállosat galget leat Word-hámis, eai pdf-fiilan. Maŋŋil 2023 dahkko plagiáhta iskkus buot čállosiin mat bohtet áigečállagii - iThenticate reaiddu bokte.

Dieđalaš artihkkalat, girjeárvvoštallamat, ávvučállosat ja doavttirlogaldallamat mat fállojuvvojit Sámi dieđalaš áigečállagii, čállojuvvojit man nu sámegillii. Áigečala almmuha sihke davvi-, julev- ja lullisámegillii.

Čállosat mat fállojuvvojit áigečállagii eai galgga leat almmuhuvvon ovdal eaige galgga leat jorgaluvvon mange eará gielas. Čállosat galget leat gielalaččat, stiillalaččat ja teknihkalaččat nu gárvvis go vejolaš, ja čálli galgá čuovvut rávvagiid mat leat Sámi dieđalaš áigečállaga ruovttusiiddus.

Čálli galgá ieš čielggadit tabeallaid, govaid ja eará dakkáriid vuoigatvuođaid ovdal go fállá artihkkala Sámi dieđalaš áigečállagii. Sámi dieđalaš áigečála ii mávsse bálkká čálliide, muhto sádde čállái ovtta gáhppálaga dan nummaris mas su čálus lea almmuhuvvon. Čállosat almmuhuvvojit sihke báberhámis ja elektrovnnalaš hámis áigečállaga neahttasiiddus.

Referánssa stiila

Stiilla namma lea Aigecala. Dán siiddus gávnnat čilgehusa, mii čájeha mo stiila doaibmá Word-dokumeanttas ja EndNote-girjerádjosa, mas leat muhtun referánsaovdamearkkat.

Čállosiid mearkamearit

Áigečállagii fállojuvvon čállosiid mearkamearit oktan gaskkaiguin leat ná:

• dieđalaš artihkkaliin 30 000 – 50 000 mearkka
• árvvoštallamiin 10 000 – 15 000 mearkka
• doavttirlogaldallamiin 15 000 – 20 000 mearkka
• fágalaš muitosániin 10 000 – 15 000 mearkka

Árvvoštallan

Dieđalaš artihkkalat: Dieđalaš artihkkalat mat sáddejuvvojit Sámi dieđalaš áigečállagii (SDÁ) árvvoštallojuvvojit guovtti vuorus. Go váldodoaimmaheaddji lea dohkkehan artihkkala doallat doarvái ala dási, de dat sáddejuvvo doaimmahusgoddái árvvoštallamii. Olles doaimmahusgoddi lohká artihkkala. Sin árvvoštallan juhkkojuvvo dasto čálliin, gii oažžu vissis áigemeari čuovvulit mearkkašumiid. Divvojuvvon artihkal máhcahuvvo dasto áigečállagii ja sáddejuvvo olggobealde árvvoštallái. Čálli ja árvvoštalli eaba diehtal goabbat guoimmisteaskka, čađahuvvo nugohčoduvvon guovttegeardásaš čalmmehis árvvoštallan. Čálli lea eaktuduvvon vuhtii váldit olggobealde árvvoštalli kommentáraid ovdal go artihkal dohkkehuvvo almmuhuvvot. Loahpalaččat artihkal sáddejuvvo gielladárkkisteapmái, mii dahkko ovttasbargun giellačeahppi ja čálli gaskkas.

Sisasáddejuvvon čállosat iskojuvvojit plagierema hárrái iThenticate reaiddu bokte.

2015 rájes SDÁ šaddá oassin SIKORis, Sámi Internationála KORpusis, mii lea sámegielat teakstačoakkáldat maid UiT Norgga árktalaš universitehta ja Norgga Sámediggi leat čohkken, ja almmustuvvan artihkkalat ja čállosat biddjojit SIKORii.

Sádde čállosa áigečállagii.